عن كل شي إلا المعزة

قال يا ستّي هداك النهار فيقتني رفيقتي من النوم, قال رزان قومي لشوف غسلي وشك وتعي لعندي عالبيت, كانت الساعة شي 10 الصبح, وكنت جاية من بيروت من يوم ملعون نفسي بدي بس نام, ماعرفت نام طبعا كرمال الخوشبوشية السورية.

قلنا ماشي الحال, فقنا وتحممنا ولبسنا وركبنا هالميكرو ياللي بوشو عالجديدة. رفيقتي نقلت من سكنا القديم لسكنا الجديد, وانا طبعا من هدول العالم ياللي بضيعو شي 15 مرة قبل ما يحفظو طريق جديد. وانا ضايعة بالجديدة, سمعت صوت معزاية, طلعت هيك لورا ولا لقيتلكن راس هالمعزاية علقان بين درابزين السوزوكي, المخلوقة ماعم تقدر تطلع راسا والله أعلم قديش صرلا هيك. وانا طبعا ما عاد همني انو انا ضايعة بالجديدة ورفيقتي عم تستناني, المعزة علقان راسا!

وقفت هيك بنص الطريق وبلشت اطلع فيها, كيف بدي طلع راسا من الدرابزين؟

مالقيت غير زلمة والله تارك شغلو وجاية يسألني وعلى وشو ابتسامة بشوشة قال يعني:”شو في؟”

“المعزة علقان راسا”

اجا قال بدو يجرب يقيم راسا من الدرابزين, وانا فوق راسو عم عيط عليه, لا مو هيك, دير بالك على ادنا, اخي خلص تركا للمخلوقة!

بعدين اجا قال لقى حل اللغز, راح على اول الطرطيرة ولقالك ولد ما بيطلع طولو متر وعم يقلو تعا شوف المعزة علقان راسا!

اجا هالولد ودفشلكن راسا شو دفشة؟ كنت رح قوم اضربو, وبلش يقيم ويحط براسا انا رح جن, كانت عينا للمعزة رح تروح, كانت ادنا رح تنشق, بالاخير مسكتلو ايدو وقلتلو تركا تركا لك اخي وينو ابوك؟ اه؟ وينو؟؟!

الولد بلش يلف يمين وشمال عم يدور على ابو.

بهالاثناء اجو تنين على الموتور ووقفو جنب هالطرطيرة, نزل واحد من الشباب وقال “شو في؟” رد الزلمة ياللي بجنبي “المعزة علقان راسا”.

اطلع فيني وقال اضحك, مالقيتو غير والله مسك راسا برفق وحنية وطلعلا راسا صاغ سليم لا في عين رايحة ولاادن طايرة.

حمل حالو ورجع على هالموتور وذهب مع الريح.

بقوم قال بيجي ابو الولد وبشغل الطرطيرة وبيحمل حالو وبروح التاني مع الريح.

انا كنت لساتني عم طلع بالمعزة, وياللي يمكن كانت عم تطلع عليي, المخلوقة كانت ما عم تقدر تحرك رقبتا, لتطلع فيني قامت حركت كل جسما ليجو عينيا بعيني, يعني رقبتا صرلا يمكن ساعات ازا مو ايام على هالحال. وكل هالصريخ ما حدا سمعو من هالشباب ياللي وقفو معي يوميتا الا لانو شافو بنت واقفة جنب هالمعزة.

يعني لولا ماني بنت, ولولا ماني بنت ضايعة بالجديدة, كانت هالمخلوقة انكسرت رقبتا.

انا بعرف انو في جحشنة بشعبنا, وزعرنة بين شبابنا, بس يوميتا انا شفت ولمست بعيني لا انسانية قاسية ماقدرت اتصالح معا ولا بدي اتصالح معا ولا بدي جرب بررا.

اي بعرف انو في ناس اوضاعا صعبة, وبعرف انو لانو وضع الانسان بالحضيض عنا بالبلد ماداير بالو الا على حالو, وانو هي تربية وهيك بصير والواحد ما بيخلق هيك, وانو ماعندو شعبنا الحكومة والوضع الاقتصادي المريح ليجي يفكر بانسانية تجاه غيرو والحيوانات والحشرات, اي الحشرات.

لك طرقاتنا مليانة جثث لقطط وكلاب ومصارينن طالعة عالشارع.

ولاد حارتنا بركن الدين كانو يقرفو روس العصافير والصيصان ليتسلو.

الصبيان كان يقطعو دنب الحردون لليشوفو وهو عم يتحرك.

كان روح قلبن يحرقو النمل وهنن عايشين.

اي اوضاعنا مو صعبة وبس, اوضاعنا بتخري, بس لساتنا عم نصلي 5 مرات بالنهار وليكنا رح نصوم برمضان ب20 الشهر مشان نفوت عالجنة.

Advertisements

14 thoughts on “عن كل شي إلا المعزة

  1. Abir G. says:

    عن أهم شي… عبر المعزة …
    بس أهم شي هو وين مكان نفس الشي… ومش بس عندكن “راس معزة ينقذ ” لأن في بنت حدو

  2. طباشير says:

    يا ستي هلأ انت ليش هيك عم تعملي معي ؟ ما بكفي المعزاية كان عصيان راسها كمان بدك تعصيلي راسي بين السين و الجيم هلأ ؟

    يعني انت مثلا ًانتبهتي انو الشباب ما وقفو ليساعدو المعزاية لو ماانك انت وقفتي جنبها ( صبيه ) و فينا نبلش من انو هالموقف لحاله هو أول خطوه بعيدا ً عن الأخلاق الانسانية ..

    الفكره التانيه اللي لفتتني هي وجود طفل صغير عم يشتغل و يدير باله عالمعزايات و هي من الاشيا المعروفة عنا بالبلد و اللي بطلت غريبه و هي فينا نسجلها كوصمـة عار تانيه عجبين الانسانية

    بس عقولتك منيح بعدنا عم نصلي خمس مرات و رح نصوم رمضان و حج و ذكاه و الخ الخ .. وهون يطالعني قول الشاعر :” الصبيان كانو يقطعو دنب الحردون ليشوفو و هو عم يتحرك “. و يمكن فينا نأسـقط هي الفكرة ( تبع دنب الحردون ) عالمجتمع اللي هو بدوره عم يتحرك ;)..

    و السلام عليكم

    تحياتي

  3. Omar says:

    Point well made Razan and yislam timmik.
    I propose we send an army of pretty girls through the streets of Damascus some to look at the crumbling walls in Old Damascus, others at the thousands of people who litter in the streets on a daily basis…

    I also have a confessions to make. I used to be one of those boys who chased cats bil 7ara.

    • Razan says:

      Haha I love the idea :)
      ومسامح إزا كنت بس عم تلحق القطط :)
      Long time no talk man, hope all is well with you!

  4. مواطن says:

    والله ما فهمت شو دخل الصيام والصلاة، انا ما بصلي ولا بصوم ولا بعترف بالله، ورغم هالشي مو مستعد وقف بالجديدة مشان خلص راس عنزة، ليش مقهورة من اللي بصلوا وبصوموا خيتو؟؟

    لو هالعنزة بشي ببلاد برا كانوا جابوا الشرطة والاطفاء وهلم جراً، بس ببلدنا، قلب العروبة النابض ومعقل الممانعة، العوض بسلامتك.

    قال جثث حيوانات وحشرات، لك العالم عم تموت جوع بالشام وعنا بحلب وعب بتقلي جثث حيوانات.

    أحلى شي هاي، قال “كل هالصريخ ما حدا سمعو من هالشباب ياللي وقفو معي يوميتا الا لانو شافو بنت واقفة جنب هالمعزة.

    يعني لولا ماني بنت, ولولا ماني بنت ضايعة بالجديدة, كانت هالمخلوقة انكسرت رقبتا.”

    ضحكتينننننني لمتت اي وربي، لك منيح اللي ما كتبتي “شافوا بنت حلوة” او “مس سيريا” بلا زغرة.

    لك مانك قصيرة وزمكة وبتطلعي بطول المعزة (شفتك عم تلتي على الجزيرة مرة)، قال بنت قال.

    اكتبي على حالك بنت مرة تانية مشان الشباب تعرف

    كنت بدي احكي لك حكاية الجمل، بتعرفيها؟؟ الجمل لو شاف حردبته لوقع وانكسرت رقبته

    مسكينة عن جد

    • Razan says:

      مواطن,
      السبب الوحيد ياللي وافقت على نشر تعليقك الفاقد لأي احترام وتهذيب هو بس لحتى يعرف القراء مستوى الناس ياللي مابوافق انشر تعليقن.

      يعني ازا منطلع على هالتعليق تبعك منلاحظ التالي:
      1-الزلمة ما عندو اي “تعليق” يقولو على “النص” غير تمسخر وسباب على “شخص” المدونة, غير هيك, هو تكرار لما جاء في النص ولا يملك فكرة مبتكرة

      2-حضرتك ما حطيت لا اسمك ولا شي طبعا لانو بتعرف انو تعليقك دون المستوى ياللي بخليك تكون واثق من حالك

      3-انته من هدول العالم ياللي بتشوفو هالمدونات بوشكن ونازلين بهادل بصاحبينا لانو فاضيين وماوراكن شي

      4-مع العلم انو ازا كان في شي زكي وحقيقي كفكرة بتعليقك, كنت غضيت النظر على السباب وناقشتك

      بس متل ما ذكرت, واحد فاضي وقليل أدب, وبدو يحكي

      طبعا تعليقك جاي تمام بسياق التدوينة, يخليناك انته وياللي متلك شو معبيين البلد

  5. انسان says:

    الانسان بطبيعته شرير. أكثر مظاهر الشر يمكن ملاحظتها عند مراقبة الأطفال من البشر، والدليل كلامك عن أولاد الحارة. الرحمة و “الانسانية” أشياء يتعلمونها من المجمتع المحيط مع الوقت، ومنهم من يبقى على طبيعته الأصلية. الدين وجد أساسا لكبح هذه الطبيعة وتمكين التجمعات البشرية الحديثة من العيش بأمان نسبي.
    http://en.wikipedia.org/wiki/Dnepropetrovsk_maniacs

Comments are closed.